අපොහොසත් හෙළබස

හිරැ අවරට යන සැඳෑවක
නුවර වැව් තාවුල්ලේ එක
ගල්කුලක් මත හිඳිනා විට
වැව් දියවර රළ මතින් නෙත
යොමා සිටිනා විටෙක ඈතක...

සැඳෑ අඹර සිසාරා නැගී සිටින
ජේතවන හා රන්වැලි සෑ දැක
නිසසල වූ හද සිතුවිලි පොදිය
චංචල කරන්නට මෙන් හමනා
වත කමල සිප ඇදෙන මද නළ...

සුන්දරත්වයන් බෙහෙවින් කැටි වූ
අලංකෘත අනුරපුර සැඳෑව පිළිබඳ
හදට නැගෙනා හැඟීම් සමුදායම
වදනින් විස්තර කෙරැමට තරම්
හෙළබස පොහොසත් නැති සැටියකි...

~සුපුන් සුදාරක~

එදා අතීතයේ රාහුල හිමි විසින් ලක් කාන්තාවන්නේ වරැණ විස්තර කල අයුරැ...

"සිසිවන උවන ඉඟ සුඟ ගත හැකි මිටින
නිසි පුලු ලුකුල රිය සක යුරැ තිසර තන
දිසිනු ලියෙව් රූසිරි යුත් මෙපුරඟන
ඇසි පිය හෙලෙන පමණින් නොවෙති දෙවඟන"

ඇස් පිල්ලම් හෙලන තරමින් පමණක් දෙවඟනුන්ට දෙවැනි වන ඒ ලාංකීය කාන්තාවගේ රෑ සිරි අද ලියැවෙන අයුරැ...

"නුඹ හැඩකාරයි කටකාරයි සොකරි යන්න එපා
පැණි රස කෑම දිව ගාලා කංසා බොන්න සුදා
සුරලොව පේන සැප ගාව මා අත් හරිනු එපා
නුඹ වැතිරීලා උඩුකුරුව සයනේ ඉන්න සොඳා"

~අසම්මත වූ ලෝකයේ අසම්මත පෙම~

අඳුරැ කුටියක් තුල
සුමුදු සයනක් මත
ප්‍රේමයේ නාමයෙන්
සේදී ගිය කල පතිවත

අසම්මතය රජ වූ ලොව තුල
ඇය....
සමාජයට පිළිලයක් ලෙස
සලකන අයවලුන්ම
නාවා ගෙට ගත් කල
පිරිමියාගේ සියලු පව්
සේදී යන බව පවසයි...

ඉදින්, 21 වන සියවසේ
නවීන පන්නයේ මිනිසුන් යැයි
උදම් අනනා අයවලුන්ගෙන්
අසන්නට ඇත්තේ....
සමානාත්මතාව යනු මෙයද??

ඔහු තවත් එක් මිනිසෙක් නම්
ඇයද තවත් එක් ගැහැණියක්
නොවන්නේ මන්ද???

ඒකිගේ සෙල්ෆිය

වැඩි කල් නැත මා කියනා සිද්ධියට
යන්නට වුනා මිතුරකු හා මලගෙදර
ආසන්නව රෑ දොලහේ කණිසමට
මිතුරා ගියා ජංගමයෙන් බුකිය වෙත

රෑ දොලහද පසු වී ගිය නිසාවෙන
ඉතිරිය කිහිප දෙනෙකුය මල ගෙදර
සිටිනා විටෙක කැරමක් ගසමින් ඔන්න
දෙවනත් වෙන්න බෙරිහන් දුනි මා මිතුර

ක්ෂණිකව ගියා ඔහු හිදිනා දිශාවට
ඇසුවෙමි උඹට අමු කැවිලද බූරුදෙන
නැත පිලිතුරක් ඔහුගෙන් ලැබුනේ මෙමට
කට ඇරගෙන බලා සිටී ජංගමය දෙස

බැලුවා අතට ගෙන ඔහුගේ ජංගමය
දුටුවා ඒ දසුන මාගේ නෙත් දෙකම
තිගැස්සී ගියා මගෙ මුලු සියොලගම
වෙව්ලන්නට විය මගෙ දෙපා යුවලම

යක්ෂණියක්ය මිතුරාගේ ජංගමයේ
ඇස් දෙක කුඩා විය එය දුටු විගසේ
මහ රෑ මලගෙදර වූ මේ ජරමරයේ
මිනියද තිගැස්සෙයි දුටුවොත් මේ රූපේ

ටික වේලාවකින් අවබෝධෙට ආවේය
බුකියේ දමා තිබුනු සේයාරුවකි එය
පෙනුමෙන් නම් මෝහිනී පරාදය
කෙල්ලෙක් දැමූ චාටර් සෙල්ෆියකි එය

~සුපුන් සුදාරක~